ਭਾਰਤੀ ਹਵਾਈ ਸੈਨਾ ਦੁਨੀਆ ਦੀ ਤੀਜੀ ਸਭ ਤੋਂ ਸ਼ਕਤੀਸ਼ਾਲੀ ਹਵਾਈ ਸੈਨਾ, ਚੀਨ ਨੂੰ ਫਿਰ ਛੱਡਿਆ ਪਿੱਛੇ
2026 ਦੀ ਵਿਸ਼ਵ ਰੈਂਕਿੰਗ ਵਿੱਚ ਭਾਰਤੀ ਹਵਾਈ ਸੈਨਾ ਨੇ ਲਗਾਤਾਰ ਤੀਜਾ ਸਥਾਨ ਕਾਇਮ ਰੱਖਿਆ। ਮੁਲਾਂਕਣ ਵਿੱਚ ਜਹਾਜ਼ਾਂ ਦੀ ਗਿਣਤੀ ਦੇ ਨਾਲ-ਨਾਲ ਤਕਨੀਕੀ ਸਮਰੱਥਾ, ਆਧੁਨਿਕੀਕਰਨ, ਲੌਜਿਸਟਿਕ ਸਹਾਇਤਾ ਅਤੇ ਸੰਚਾਲਨ ਕੁਸ਼ਲਤਾ ਨੂੰ ਵੀ ਸ਼ਾਮਲ ਕੀਤਾ ਗਿਆ।
ਨਵੀਂ ਦਿੱਲੀ: ਵਰਲਡ ਡਾਇਰੈਕਟਰੀ ਆਫ ਮਾਡਰਨ ਮਿਲਟਰੀ ਏਅਰਕ੍ਰਾਫਟ (WDMMA) ਦੀ 2026 ਦੀ ਰੈਂਕਿੰਗ ਅਨੁਸਾਰ ਭਾਰਤੀ ਹਵਾਈ ਸੈਨਾ ਨੇ ਲਗਾਤਾਰ ਤੀਜੀ ਵਾਰ ਦੁਨੀਆ ਦੀ ਤੀਜੀ ਸਭ ਤੋਂ ਸ਼ਕਤੀਸ਼ਾਲੀ ਹਵਾਈ ਸੈਨਾ ਦਾ ਸਥਾਨ ਬਰਕਰਾਰ ਰੱਖਿਆ ਹੈ। ਇਸ ਰੈਂਕਿੰਗ ਵਿੱਚ ਭਾਰਤ ਨੇ ਇੱਕ ਵਾਰ ਫਿਰ ਚੀਨ ਦੀ ਹਵਾਈ ਸੈਨਾ ਨੂੰ ਪਿੱਛੇ ਛੱਡ ਦਿੱਤਾ ਹੈ।
ਇਸ ਮੁਲਾਂਕਣ ਵਿੱਚ ਸਿਰਫ਼ ਜਹਾਜ਼ਾਂ ਦੀ ਗਿਣਤੀ ਹੀ ਨਹੀਂ, ਸਗੋਂ ਬੇੜੇ ਦੀ ਬਣਤਰ, ਤਕਨੀਕੀ ਸਮਰੱਥਾ, ਆਧੁਨਿਕੀਕਰਨ, ਲੌਜਿਸਟਿਕ ਸਹਾਇਤਾ ਅਤੇ ਸੰਚਾਲਨ ਕੁਸ਼ਲਤਾ ਵਰਗੇ ਮਹੱਤਵਪੂਰਨ ਮਾਪਦੰਡਾਂ ਨੂੰ ਵੀ ਧਿਆਨ ਵਿੱਚ ਰੱਖਿਆ ਗਿਆ ਹੈ।
ਰਿਪੋਰਟ ਮੁਤਾਬਕ ਭਾਰਤੀ ਹਵਾਈ ਸੈਨਾ ਕੋਲ ਇਸ ਵੇਲੇ ਕੁੱਲ 1,716 ਹਵਾਈ ਜਹਾਜ਼ ਹਨ। ਇਨ੍ਹਾਂ ਵਿੱਚ 542 ਲੜਾਕੂ ਜਹਾਜ਼ ਸ਼ਾਮਲ ਹਨ, ਜੋ ਸੱਤ ਵੱਖ-ਵੱਖ ਕਿਸਮਾਂ ਦੇ ਹਨ। ਇਸ ਅੰਕੜੇ ਵਿੱਚ ਸਤੰਬਰ 2025 ਵਿੱਚ ਸੇਵਾ ਤੋਂ ਹਟਾਏ ਗਏ ਮਿਗ-21 ਜਹਾਜ਼ ਵੀ ਸ਼ਾਮਲ ਕੀਤੇ ਗਏ ਹਨ।
ਇਸ ਤੋਂ ਇਲਾਵਾ ਭਾਰਤੀ ਹਵਾਈ ਸੈਨਾ ਦੇ ਬੇੜੇ ਵਿੱਚ 498 ਹੈਲੀਕਾਪਟਰ ਹਨ। ਇਨ੍ਹਾਂ ਵਿੱਚ 222 Mi-17 ਹੈਲੀਕਾਪਟਰ ਅਤੇ ਸਵਦੇਸ਼ੀ HAL ਧ੍ਰੁਵ ਅਤੇ ਰੁਦ੍ਰ ਦੇ 111 ਪਲੇਟਫਾਰਮ ਸ਼ਾਮਲ ਹਨ।
ਭਾਰਤੀ ਹਵਾਈ ਸੈਨਾ ਕੋਲ 282 ਟਰਾਂਸਪੋਰਟ ਜਹਾਜ਼ ਅਤੇ 374 ਟ੍ਰੇਨਿੰਗ ਜਹਾਜ਼ ਵੀ ਹਨ। ਇਨ੍ਹਾਂ ਵਿੱਚੋਂ 325 ਜਹਾਜ਼ ਸਿਰਫ਼ ਸਿਖਲਾਈ ਦੇ ਉਦੇਸ਼ ਲਈ ਵਰਤੇ ਜਾਂਦੇ ਹਨ। ਸੰਤੁਲਿਤ ਅਤੇ ਆਧੁਨਿਕ ਬੇੜੇ ਕਾਰਨ ਭਾਰਤੀ ਹਵਾਈ ਸੈਨਾ ਨੇ ਵਿਸ਼ਵ ਪੱਧਰ ‘ਤੇ ਆਪਣੀ ਮਜ਼ਬੂਤ ਸਥਿਤੀ ਹੋਰ ਮਜ਼ਬੂਤ ਕੀਤੀ ਹੈ।
